ទំនាក់ទំនង Facebook
សមាគមរស្មីកុមារកម្ពុជា
លោកស្រីជុំ សាមីន និងសហព័ន្ធសមាគមមិត្តភាពវៀតណាមកម្ពុជា ខេត្តគៀងយ៉ាងចុះសួរសុខទុក្ខសមាគមរស្មីកុមារកម្ពុជាត្នោតជ្រុំ
AKP ភ្នំពេញថ្ងៃទី ២១ ខែ មករា ឆ្នាំ ២០១៣– លោកស្រី ជុំ សាមីន កែបជុតិមា ប្រធានគណៈកម្មាធិការសមាគមនារីកម្ពុជា ដើម្បីសន្តិភាព និងអភិវឌ្ឍន៍រាជធានីភ្នំពេញ ដែលជា តំណាងដ៏ខ្ពង់ខ្ពស់របស់លោកស្រី ម៉ែន សំអន ឧបនាយករដ្ឋមន្រ្តី ប្រចំាការនិងជារដ្ឋមន្រ្តីទំនាក់ទំនងជាមួយព្រឹទ្ធសភា រដ្ឋសភា និងអធិការកិច្ចបាននំាគណៈប្រតិភូសហ ព័ន្ធសមាគមមិត្តភាពវៀតណាមក្ពុជាខេត្តគៀងយ៉ាងដឹកនំាដោយលោក ឡេង យំាងដុង ប្រធានសហ ព័ន្ធសមាគមមិត្តភាពវៀតណាម-កម្ពុជា ខេត្តគៀងយ៉ាងសាធារណរដ្ឋសង្គមនិយមវៀតណាមទៅសួរ សុខទុក្ខ និងចែកអំណោយដល់សមាគមរស្មីកុមារកម្ពុជាដែលមានទីតំាងនៅសហគមន៍ត្នោតជ្រុំ ៤ ក្នុង សង្កាត់បឹងទំពន់ ខណ្ឌមានជ័យ រាជធានីភ្នំពេញ កាលពីថ្ងៃទី ២១ ខែមករាឆ្នំា ២០១៣ កន្លងទៅនេះ។
លោក ប៉ាត ណូន ប្រធានក្រុមប្រឹក្សាភិបាលសមាគមរស្មីកុមារកម្ពុជាបានលើកឡើងពីការងារ របស់សមាគមដែលជាមជ្ឈមណ្ឌល បណ្តុះបណ្តាលកុមារកំព្រា អនាថា និងនិសិត្សទីទ័លក្រលើជំនាញ សំអាងការ កែសម្ភស្ស និងជួសជុល នៅតាមអង្គការនានា ដែលគេអាចជួយបាននាពេលកន្លង មក ក្នុងនោះក៏មាន ក្រុមសិល្បះ បណ្តុះបណ្តាលផ្នែកកីឡាប្រដាល់ក្បាច់គុនបូរាណខ្មែរ និងកីឡាបាល់ ទាត់ជាដើម អស់រយះពេល ១៣ ឆ្នំាមកហើយតំាងពីឆ្នំា ១៩៩៥ ហើយកាលនោះមានទីតាំងនៅ សំ ណង់អនាធិប តេយ្យប៊ូឌីង លុះដល់ឆ្នំា ២០០៨ សាលារាជធានីភ្នំពេញបានប្តូរទីតំាងថ្មីឲ្យសមាគមមក តំាងទីលំនៅក្នុងសហគមន៍ត្នោតជ្រុំ ៤ សង្កាត់បឹងទំពន់ ខណ្ឌមានជ័យ រហូតមកដល់ពេលនេះមាន រយះពេល ៥ ឆ្នំាហើយ។ លោក ប៉ាត ណូន បានបន្តថា ក្រោយមកនៅទីតំាងថ្មីនេះសមាគមបានការជួយគិតគូ និងយក ចិត្តទុកដាក់ពីរាជរដ្ឋាភិបាល ពិសេសពី ឯកឧត្តម កែប ជុតិមា អភិបាលរាជធានីភ្នំពេញ និងលោកស្រី បានជួយផ្នែកហូបចុក សាលារៀន អាគារស្នាក់នៅចំនួន ២ ខ្នងក្លឹបកីឡាប្រដាល់មួយខ្នង។ល។និងពី លោក គួច ចំរើន អភិបាលខណ្ឌមានជ័យ និងលោកស្រីព្រមទំាងអាជ្ញាធរគ្រប់ថ្នាក់ផងដែរ។លោក ប៉ាត់ ណូន ក៏បានលើកឡើងពីសមិទ្ធផលរបស់សមាគម ដែលមាននិងកំពុងកសាង ដែលមកដល់ ពេលនេះសមាគមមាន កុមារកំព្រា និងអនាថា និសិត្សក្រីក្រមានចំនួន ១០៥ នាក់បុគ្គលិក ២២ នាក់ និងកីឡាករ ៩ នាក់។
លោក ឡេ យំាងដុង បានសំដែងនូវការីករាយដោយបានឃើញកុមារទំាងអស់នៅក្នុងសមាគម នេះមានទឹកមុខស្រស់ប្រកបមាន សុខភាពល្អ ហើយលោកសូមកោតសរសើរចំពោះសមាគមរស្មីកុមារ កម្ពុជា ដែលមានការគំាទ្រ និងជួយជ្រោមជ្រែង ពីអាជ្ញាធររាជធានីភ្នំពេញ និងអាជ្ញាធរគ្រប់លំដាប់ថ្នាក់ ដែលបានបង្ហាញពីការគិតគូរដល់អនាគតរបស់កុមារ មិនថាកុមារកំព្រាឬជនអនាថាទេពួកគេសុទ្ធតែ ជាពលរដ្ឋដូចគ្នាដែលចំាបាច់ត្រូវយកចិត្តទុកដាក់ពីពួកគេគ្រប់ពេល។លោក ឡេ យំាងដុង បានបន្តថា កុមារទំាងអស់នេះនៅពេលខាងមុខពួកគេពិតជាមានមុខរបរសមរម្យ និងពិតប្រាកដមួយដោយពួក គេបានទទួលការបណ្តុះបណ្តាលយ៉ាងត្រឹមត្រូវពីសមាគមផង និងពីអាជ្ញាធរផងនោះ។ លោកប្រធានសហព័ន្ធសមាគមវៀតណាមកម្ពុជាខេត្តគៀងយ៉ាងបានបញ្ជាក់ទៀតថា លោក មកទីនេះដើម្បីសួរសុខទុក្ខផង និងនំាយកអំណោយតិចតួចមកចែកជូនកុមារកំព្រា និងអនាថា ព្រម ទំាងនិសិត្សទីទ័លក្រ មន្រ្តីបុគ្គលឹកនៅទីនេះ ដើម្បីជាការផ្សារភ្ជាប់នូវទំនាក់ទំនងល្អរវាងខេត្តគៀង យ៉ាង និងរាជធានីភ្នំពេញឲ្យកាន់តែជិតស្និតបន្ថែមទៀតគង់វង់ជារៀងរហូត។
លោកស្រីជុំ សាមីន កែបជុតិមា បានថ្លែងអំណគុណយ៉ាងជ្រាលជ្រៅចំពោះសហព័ន្ធសមាគម មិត្តភាពវៀតណាមកម្ពុជាខេត្តគៀងយ៉ាង ដែលបានយកចិត្តទុកដាក់គិតគូរពីសុខទុក្ខកុមារកំព្រានិង អនាថានៅសមាគមរស្មីកុមារកម្ពុជានាពេលនេះ គឺជាទឹកចិត្ត មនុស្សធម៍ មួយដ៏ល្អរបស់មិត្តភ័ក្រ្តជិតខាង ដែលជួយគ្នាទៅវិញទៅមក ហើយមិត្តវៀតណាម តែងតែគិតគូដល់ សុខទុក្ខបងប្អូនប្រជាជនកម្ពុជា គ្រប់ពេលវេលា ដែលបងប្អូនកម្ពុជាមិនដែលបំភ្លេចគុណចំពោះបងប្អូនវៀតណាមទេ។ លោកស្រីជុំ សាមីន កែបជុតិមា ក៏បានរំលឹកឡើងវិញថា សមាគមរស្មីកុមារកម្ពុជានេះ កន្លង មកបានទទួលនូវការយកចិត្តទុកដាក់គិត គូរគ្រប់យ៉ាងពីរាជរដ្ឋាភិបាល ពិសេសពីសំណាក់លោក អភិបាលរាជធានីភ្នំពេញ ពីគណបក្សប្រជាជនរាជធានីភ្នំពេញ ពីសមាគម នារីរាជធានីភ្នំពេញ ពីសហ ព័ន្ធសមាគមយុវជនរាជធានីភ្នំពេញ ពីអាជ្ញាធរខណ្ឌមានជ័យក្នុងការជួយឧបត្ថម្ភគំាទ្រដល់សមាគម នេះគ្រប់យ៉ាង ដើម្បីជួយបណ្តុះបណ្តាលធនធានមនុស្សឲ្យក្លាយទៅជាពលរដ្ឋល្អមានមុខរបរពិត ប្រាកដ សម្រាប់ចិញ្ចឹម ជីវិតទៅអនាគតដោយជួយតំាងពីកកើតរហូតទទួលបានជោគជ័យ និងបន្តទៅ មុខទៀត។ នៅក្នុងឱកាសដែរលោកស្រីប្រធានបានផ្តល់ថវិកាចំនួន ១ លានរៀលដល់សមាគមរស្មីកុមារ កម្ពុជាផងដែរ ហើយសហព័ន្ធសមាគម មិត្តភាពវៀតណាមក្ពុជាខេត្តគៀងយ៉ាងក៏បានចែកអំណោយ ដល់កុមារ និងសិស្សទីទ័លក្រចំនួន ១០៥ នាក់ក្នុងម្នាក់ទទួលបាន ៣ ម៉ឺនរៀលបុគ្គលិកគ្រូៗ ចំនួន ២២ នាក់ក្នុងម្នាក់ៗ ទទួលបាន ៦ ម៉ឺនរៀលនិងកីឡាករ ៩ នាក់ក្នុងម្នាក់ៗទទួលបានចំនួន ៦ ម៉ឺនរៀល៕ ដោយ លោក សួស សំរិត
(ភ្នំពេញប៉ុស្ត)ភ្នំពេញ : កំប្លង់ៗអើយ នាំគ្នាលេងត្រុដិ តាំងចិត្តបរិសុទ្ធជារបាំខ្មែរ... គឺជាចម្រៀងដែលច្រៀងចេញពីក្រុមសិល្បករវ័យក្មេងមួយក្រុម ឲ្យតែឮនូវចម្រៀងនេះ ប្រជាជនខ្មែរទាំងក្មេងចាស់ ប្រុសស្រី តែងបង្ហាញនូវអារម្មណ៍សប្បាយរីករាយ ក្នុងការទស្សនានូវរបាំត្រុដិនេះ ដែលជារបាំជួយដេញនូវឧបទ្រពចង្រៃ ដើម្បីផ្លាស់ឆ្នាំចាស់ចូលឆ្នាំថ្មីនាំមកនូវសេចក្តីសុខសប្បាយ ដល់ពួកគេ។
នៅពីក្រោយប្រភេទសិល្បៈខ្មែរមួយនេះ ក៏នៅមានរឿងរ៉ាវគួរឲ្យចាប់អារម្មណ៍ជាច្រើនរបស់សិល្បករ សិល្បការិនីវ័យក្មេងប្រមាណជាង៨០នាក់ ដែលបានស្នាក់នៅ និងធំធាត់ដឹងក្តីនៅក្នុងផ្ទះដីឡូត៍អមដោយអគារកម្ពស់ពីរជាន់សង ខាងនៅឯភូមិត្នោតជ្រំ សង្កាត់បឹងទំពុន ខណ្ឌមានជ័យ រាជធានីភ្នំពេញ ជាទីដែលជួយឲ្យពួកគេរកឃើញពន្លឺសន្សឹមៗនៃអនាគត។តាំងពីព្រលឹមស្រាងៗ នៅរដូវចូលឆ្នាំថ្មីប្រពៃណីខ្មែរបែបនេះ នៅចន្លោះអគារភ្លោះទាំងនេះក្នុងមណ្ឌលនៃសមាគមរស្មីកុមារកម្ពុជា យើងអាចឃើញកុមារ និងក្មេងជំទង់ជាច្រើន ខ្លះទើបក្រោកពីដំណេកទាំងមមិងមមាំងនៅឡើយ ខ្លះកំពុងស្លៀកក្បិន ខ្លះផាត់មុខ និងខ្លះទៀតកំពុងរៀបចំផ្លែឈើសំណែន ទៅតាមការបង្គាប់យ៉ាងស្លូតបូត និងអំណត់របស់បុរសមាឌល្អិត វ័យចំណាស់ម្នាក់ ដែលត្រូវបានពួកគេហៅថា «លោកតា» និងត្រូវបានស្គាល់ថា ជាប្រធានក្រុមប្រឹក្សាភិបាលនៃសមាគមរស្មីកុមារកម្ពុជា។
បុណ្យចូលឆ្នាំខ្មែរឆ្នាំថោះនេះ ក្រសួងវប្បធម៌ និង ក្រសួងទេសចរណ៍បានបំផុសឲ្យមានចលនាផ្សព្វផ្សាយវប្បធម៌ ប្រពៃណីខ្មែរឲ្យផុសផុលឡើង ខណៈពេលដែលវប្បធម៌ចិន និងវប្បធម៌បរទេសកំពុងតែដុះដាលនៅលើទឹកដីកម្ពុជា នេះជាការលើកឡើងរបស់លោក ប៉ាត ណូន ប្រធានក្រុមប្រឹក្សាភិបាល នៃសមាគមរស្មីកុមារកម្ពុជា។
លោក ប៉ាត ណូន បានឲ្យដឹងថាជារៀងរាល់ឆ្នាំចាប់ពីថ្ងៃទី១ ដល់ថ្ងៃទី៣០ខែមេសា ក្រុមសិល្បៈកុមារកំព្រាយើងខ្ញុំ តែងតែត្រូវបានអនុញ្ញាតដោយក្រសួងវប្បធម៌ ដើម្បីចេញសម្តែង និងរាំជូនពរ នៅតាមក្រសួង មន្ទីរ សណ្ឋាគារ ភោជនីយដ្ឋាន ផ្ទះសំណាក់ ក្រុមហ៊ុន និងគេហដ្ឋាននានា ទូទាំងរាជធានីភ្នំពេញ គឺដើម្បីបណ្តាញចោលនូវភាពសៅហ្មង ពីឆ្នាំចាស់ឲ្យអស់ ហើយលើករាសីឆ្នាំថ្មី រកស៊ីមានបាន ជួបប្រទះនូវសេចក្តីសុខចម្រើនជារៀងរហូត ចាប់ពីឆ្នាំនេះតទៅ។
ប្រធានក្រុមប្រឹក្សាភិបាលរូបនេះ ក៏បានឲ្យដឹងពីប្រវត្តិនៃការបើកសមាគម ដែលជាមណ្ឌលបណ្តុះបណ្តាល កុមារកំព្រា អនាថា និងក្រីក្រនេះថា៖ «កាលពីដើម ខ្ញុំបើកភោជនីយដ្ឋានសត្វព្រៃនៅជំនាន់អ៊ុនតាក់ ក្រោយពីអ៊ុនតាក់ទៅស្រុកអស់ ខ្ញុំឃើញក្មេងៗសុំបាយហូប សុំឆ្អឹងគុយទាវទឹកស៊ុបហូប ខ្ញុំមានចិត្តសង្វេគ ព្រោះកាលមុននោះ ខ្ញុំធ្លាប់បានបួសអស់១៨ឆ្នាំ និងចិញ្ចឹមកុមារឲ្យរៀនបានជាង៣០០នាក់ឯណោះ»។
លោកបានបន្តថា៖ «ដូច្នេះ ខ្ញុំក៏មានការសង្វេគ ហើយក៏លក់ហាងបានលុយជាងពីរពាន់ដុល្លារយកទៅបង្កបង្កើតសាលារៀន ហើយក៏ដើរប្រមូលក្មេងៗដែលអត់ផ្ទះ អត់បាយអត់ទឹកយកមកចិញ្ចឹមក្នុងមណ្ឌលចាប់តាំងពីពេលនោះមក ដោយមុនដំបូងឡើយ យើងមិនមានជំនួយពីខាងណាទេ យើងគ្រាន់តែដើរទំនាក់ទំនងសុំគេឲ្យបង្ហាត់ និងសម្តែងសិល្បៈតាមពិធីបុណ្យតាមស្រុកស្រែចំការ តាមភូមិ ដោយអាចផ្តល់ថវិកាតាមសទ្ធា ហើយក្រោយមកក៏មានជំនួយជាអង្ករ ម្ហូបអាហារ និងលុយកាក់ខ្លះពីសប្បុរសជនទាំងនោះ»។
សមាគមរស្មីកុមារកម្ពុជា ចាប់ផ្តើមសម្ពោធជាផ្លូវការនៅឆ្នាំ១៩៩៥ និងមានការអនុញ្ញាតពីក្រសួងអប់រំ យុវជន និងកីឡាឲ្យបើកជាសាលារៀន ដោយមានត្រឹមថ្នាក់មតេ្តយ្យដល់ថ្នាក់ទី៣ប៉ុណ្ណោះ ហើយសិស្សចាប់ពីថ្នាក់ទី៤ទៅត្រូវបញ្ជូនចូលសាលារដ្ឋ និងថ្នាក់ភាសាក្រៅម៉ោង។
បច្ចុប្បន្ន សមាគមមានបុគ្គលិកចំនួន១៧នាក់ នៅគ្រប់គ្រង និងធ្វើការអប់រំដែលពួកគាត់មួយចំនួនសុទ្ធតែបានចូលនិវត្តន៍ ចំណែកកុមារ និងយុវជនមានចំនួន ៨៥នាក់ ក្នុងនោះមាននិស្សិត២២នាក់ និងកីឡាករហាត់ប្រដាល់នៅទីនោះចំនួន ១២នាក់ទៀតផង ដែលជាក្មេងកំព្រា អតីតក្មេងអនាថា ក្រីក្រគ្មានទីពឹង ដែលមានអាយុតាំងពីមួយខួបដល់២៤ឆ្នាំ។
តាមរយៈលោក ប៉ាត ណូន រហូតមកដល់ពេលនេះ សមាគមបានទទួលជំនួយខ្លះៗជាប្រចាំដូចជា ពីអង្គការយូអេមស៊ី ដែលបានជំនួយគ្រូ៧នាក់មកបង្ហាត់បង្រៀនក្មេងៗ និងប្រាក់ចំនួន១០០ដុល្លារសម្រាប់ម្ហូបអាហារ និងម្ហូបចំនួន២ថ្ងៃ ក្នុង១សប្តាហ៍ពីសណ្ឋាគារកាបូឌីយ៉ាណា និងពីលោក សូរ ឃុន ចំនួន៥០ដុល្លារក្នុង១ខែ ក្រៅពីនេះ ក៏មានជំនួយក្រៅខ្លះៗពីអង្គការមួយចំនួន និងសប្បុរសជនទៅតាមសទ្ធារបស់ពួកគេ ជាពិសេសគឺអភិបាលខណ្ឌមានជ័យដែលតែងតែជួយឧបត្ថម្ភដល់ពួកគេនៅពេល ដែលមានការខ្វះខាតខ្លាំង។
ដោយមានដើមកំណើតនៅភូមិដីក្រហមបានចំនួន១៣ឆ្នាំ លោក ប៉ាត ណូន បានឲ្យដឹងថា៖ «ពេលនោះមណ្ឌលយើងមានទីតាំងជាប់នឹងនាយកដ្ឋានវិចិត្រសិល្បៈ ដូច្នេះគ្រូៗដែលបង្ហាត់ក្មេងៗ គឺត្រូវបានយកពីនាយកដ្ឋានទាំងអស់»។
លោកបានបន្តថា៖ «ប៉ុន្តែសព្វថ្ងៃ ដោយសាលាមធ្យមសិក្សាវិចិត្រសិល្បៈនៅឆ្ងាយ ដូច្នេះយើងត្រូវចំណាយថវិកាច្រើនក្នុងការឲ្យពួកគេធ្វើដំណើរ ទោះបីជាសិស្សខ្លះមានកង់ ប៉ុន្តែយើងនៅតែមានខ្វះខាតដដែល ធ្វើឲ្យសិស្សតូចៗ ដែលសូម្បីតែរៀននៅសាលាជិតបំផុតក៏ត្រូវដើរពី៣ទៅ៤គីឡូដែរ ដើម្បីទៅដល់សាលារៀន»។
ក្នុងវ័យ២៤ឆ្នាំ មូរ ស៊ីគាន គឺជាសិស្សម្នាក់ក្នុងចំណោមសិស្ស១០នាក់ផ្សេងទៀតនៅក្នុងមណ្ឌល ដែលបានប្រឡងជាប់សញ្ញាបត្រមធ្យមសិក្សាទុតិយភូមិ៣ឆ្នាំមកហើយ ពីខេត្តបន្ទាយមានជ័យដែលជាស្រុកកំណើតរបស់នាង។
ដោយទើបតែស្នាក់នៅក្នុងមណ្ឌលទើបតែបានមួយខែប៉ុណ្ណោះ ដូច្នេះ ស៊ីគាន មិនទាន់បានរៀនសិល្បៈពីសិស្សច្បងរបស់នាងបានច្រើននៅឡើយទេ ប៉ុន្តែនាងក៏អាចចូលរួមក្នុងការសម្តែងរបាំត្រុដិក្នុងនាមជាអ្នក រាំបុកកញ្ឆែត។
ស៊ីគាន ថ្លែងថា៖ «ខ្ញុំមានចិត្តសប្បាយរីករាយយ៉ាងខ្លាំងដោយសារតែនៅទីនេះ ខ្ញុំអាចរកប្រាក់បានខ្លះៗ សម្រាប់ខ្លួនឯង និងជួយសមាគម ព្រោះនៅស្រុក ជីវភាពឪពុកម្តាយខ្ញុំមានការខ្វះខាតណាស់ ហើយមិនអាចឲ្យខ្ញុំរៀនបន្តបាន»។
ចំណែក កែវ សុភណ្ឌ ក្នុងវ័យ២០ឆ្នាំ ជាសិស្សម្នាក់ក្នុងចំណោមសិស្ស៣នាក់ដែលត្រៀមប្រឡងសញ្ញាបត្រមធ្យម សិក្សាទុតិយភូមិក្នុងឆ្នាំនេះ។ សុភណ្ឌបានឲ្យដឹងថា នាងបានមករស់នៅក្នុងមណ្ឌលតាំងពីនាងមានអាយុ៥ឆ្នាំ ដោយសារតែនាងមានចំណាប់អារម្មណ៍តាំងពីពេលដែលក្រុមសិល្បៈសមាគម រស្មីកុមារកម្ពុជាបានទៅសម្តែងនៅក្នុងភូមិរបស់នាងនៅក្នុងខេត្ត តាកែវ។
សុភណ្ឌ បាននិយាយរៀបរាប់ថា៖ «ខ្ញុំសុំម្តាយរបស់ខ្ញុំថា ខ្ញុំចង់ហាត់សម្តែងជាមួយពួកគេ ពេលដែលដឹងថា សមាគមនេះទទួលចិញ្ចឹមក្មេងក្រីក្រ ម្តាយរបស់ខ្ញុំក៏ព្រមឲ្យខ្ញុំ និងប្អូនស្រីខ្ញុំមកនៅក្នុងមណ្ឌលនេះតែម្តង»។
នាងបាននិយាយទៀតថា៖ «ខ្ញុំគិតថា បើសិនជាគ្មានសមាគមនេះ ខ្ញុំប្រហែលជាមិនបានរៀនចេះដឹង រហូតជិតចប់បាក់ឌុបយ៉ាងនេះទេ»។
សុភណ្ឌ មិនទាន់មានគោលដៅច្បាស់លាស់ក្នុងការបន្តសិក្សានៅថ្នាក់ឧត្តម នោះទេ ប៉ុន្តែនាងបានឲ្យដឹងថា៖«ខ្ញុំចង់រៀនផ្នែកទំនាក់ទំនង និងផ្នែកគណនេយ្យដែរ»។
នៅក្នុងមណ្ឌល សុភណ្ឌ ត្រូវឆ្លៀតពេលទំនេរពីការសិក្សាដើម្បីមើលថែទាំក្មេងៗ បង្ហាត់សិល្បៈ និងភាសាអង់គ្លេសខ្លះៗដល់ពួកគេ ព្រមទាំងចូលរួមសម្តែងសិល្បៈគ្រប់ប្រភេទជាប្រចាំ ជាពិសេសនៅរដូវបុណ្យភ្ជុំ បិណ្ឌ និងបុណ្យចូលឆ្នាំខ្មែរ។ ក្រៅពីនេះសមាគមក៏មានទទួលសម្តែងគ្រប់កម្មវិធីសិល្បៈទាំងអស់ ទៀតផង៕
កោះសន្តិភាព៖ កាកបាទក្រហមខណ្ឌមានជ័យនាំយកអំណោយចែកជូនកុមារកំព្រានៅសមាគម «រស្មីកុមារកម្ពុជា»
បញ្ចូលអត្ថបទ ៖ ចន្ទ្រគ្រាស
ថ្ងៃពុធ ទី១០ ខែមិថុនា ឆ្នាំ២០១៥ ម៉ោង ១៦:១៥
រាជធានីភ្នំពេញ ៖ អនុសាខាកាកបាទក្រហមកម្ពុជាប្រចាំខណ្ឌមានជ័យ បាននាំយកអំណោយចែកចាយជូនកុមារកំព្រាក្រីក្រដែលរស់នៅក្នុងសមាគម «រស្មីកុមារកម្ពុជា» មានទីតាំងស្ថិតក្នុងភូមិត្នោតជ្រុំ៤ សង្កាត់បឹងទំពុន ខណ្ឌមានជ័យ ក្រោមវត្តមានលោកឌី រ័ត្នខេមរុណ អភិបាលរងនៃគណៈអភិបាលខណ្ឌមានជ័យ និងជាប្រធានកាកបាទក្រហមប្រចាំខណ្ឌ ។
អំណោយត្រូវបានចែកជូននៅព្រឹកថ្ងៃទី១០ មិថុនា ២០១៥ រួមមានទឹកបរិសុទ្ធចំនួន១០កេស, ទឹកត្រី១០កេស, ទឹកស៊ីអ៊ីវ១០កេស , មីយើង១០កេស, ត្រីខកំប៉ុង២កេសធំ, នំប៉័ង២កេសធំ, អង្គរ៣ប៉ាវ និងថវិការចំនួន១០០ដុល្លារជូនដល់ប្រធានសមាគម ។
លោកបាត ណូន ប្រធានគ្រប់គ្រងសមាគមកុមារកំព្រាខាងលើ បានប្រាប់ឱ្យដឹងថា សព្វថ្ងៃមានកុមារកំព្រាសរុបចំនួន៦៣នាក់ ក្នុងនោះមាន១២នាក់ជានិស្សិត សេសសល់គឺជាកូនក្មេងដែលមានអាយុក្រោម១៥ឆ្នាំ ។ អ្នកទាំងអស់ភាគច្រើនសុទ្ធតែមកពីតាមបណ្តាខេត្តនានាក្នុងប្រទេស ដែលក្នុងនោះដែរអ្នកខ្លះជាកូនកំព្រាឪពុកម្តាយ, អ្នកខ្លះជីវភាពក្រីក្រតោកយ៉ាក និងអ្នកខ្លះខ្វះទីពឹង និងទីជម្រក ។ លោកបាត ណូន បន្តថា សមាគមរស្មីកុមារកម្ពុជាបង្កើតឡើងតាំងពីឆ្នាំ១៩៩១ មកម្ល៉េះ ហើយបង្កើតឡើងក្នុងគោលបំណងជួយសង្គ្រោះដល់កុមារក្រីក្រ ទីទ័ល និងកុមារដែលកំព្រាឪពុកម្តាយឱ្យឱកាសបានរៀនសូត្រ យល់ដឹង ទៅថ្ងៃមុខ ។ លើសពីនេះ សមាគមបានផ្តល់កន្លែងស្នាក់នៅដល់ពួកគេផងដែរ ដោយមិនគិតថ្លៃ បន្ទាប់ពីមានអង្គការសប្បុរសធម៌នានាក្នុងស្រុក និងក្រៅស្រុក តែងតែជួយឧបត្ថម្ភដល់សមាគមយើងជាបន្តបន្ទាប់ ។
លោកឌី រ័ត្នខេមរុណ បានមានប្រសាសន៍សំណេះសំណាលសួរសុខទុក្ខជាមួយក្រុមក្មួយៗ និងកុមារកំព្រាទាំងអស់ ដែលរស់នៅសមាគមខាងលើ ។ ហើយលោកអភិបាលរងក៏បានធ្វើការផ្តែផ្តាំផ្ញើដល់ក្មួយៗឱ្យខិតខំប្រឹងប្រែងរៀនសូត្របន្ថែម មិនត្រឹមអស់សង្ឈឹមក្នុងជីវិតឡើយ ទោះជាយើងកើតមកគ្មានឪពុកម្តាយ ឬកើតមកក្នុងជីវភាពក្រីក្រលំបាកយ៉ាងណាក៏ដោយ ក៏ត្រូវតែមានការតស៊ូជម្រះនូវគ្រប់ឧបសក្តិ និងទុក្ខលំបាកចំពោះមុខជានិច្ចមិនត្រូវរារេថយក្រោយឡើយ ។
ឆ្លៀតក្នុងឱកាសនោះ លោកអភិបាលរងបានចែកនំប៉័ងដល់ក្មួយៗសម្រាប់បរិភោគ រួមទាំងផ្តល់ជូន ដល់សម្ភារៈសិក្សាផ្សេងៗដែលមានដូចជាប៊ិច បន្ទាត់ ខ្មៅដៃ សម្រាប់ក្មួយយកទៅសិក្សា និង ព្រមទាំងថតរូបទុក្ខជាអនុស្សាវរីយ៍ផងដែរ ៕
No comments:
Post a Comment